Bus tae Rosewell
Noo, there's things ye hear sometimes that bide in yer mind;
Braw phrases, an' words o' sich different kind,
an' yin aye stan's oot that I feel i maun tell,
Soonds simple and' hamely: “The bus tae Rosewell”.
There's an air roon' about it; This sentence I quote,
that reminds me o' scenes rural-lovers micht note.
(Here's jist an idea the cooncil could sell:
“Ye're doon in the mooth? Tak' the bus tae Rosewell”).

Weel – a'm no braggin', frien's here, fer there's jaunts that I like,
by ship, 'plane an' car, an' on horseback, or bike.
Bit nicest wee journey that ever befell
Occurred on the day I took bus tae Rosewell!
Shair, there's ither starvaigans that beckon tae me,
whaur natur's ain posies are bonnie tae see –
Like yon walk tae Hillend or Colinton Dell.
Bit a'd raither by far tak' the bus tae Rosewell!
Aye, at times there are trauchles fair skelpin' at us.
Still, things kin look different fae tap o' a bus.
Leastwis' that's hoo I am thinking masel'.
Especially if it's... The bus tae Rosewell!