Gorgie Landmarks
Maist Gorgie things are easily kent
I thocht as 'lang the road I went.
Some hallowed by auld time itsel',
Wi' ithers – new- revered as well.
There's 'Tiv', that's ayeways recognised,
Tynecastle grund gets advertised:
White Park these days is lookin' nice,
D'ye peep in shop that sells the mice?
Yon glue works – gin ye've no' a map,
Jist watch fur seagulls on the tap:
'The cottages' are fine an' near
(We yince got chased wi' bobby here).
Ower tae gairdens, aren't they spruce?
Wi' dally, pink, an' tea-rose bush:
The ancient mansion, towerin' high,
and waterfa', and wagtail's cry.
Nu back the way on self-same side,
'The Flets' folk say, are Gorgie's pride;
Nu vintage pictur' hoose, ye see,
That wisnae there when I wis wee.
There's mony mair deserves a line
in this topography o' mine:
Inspired it a'? familiar face -
we met the fit 'o Wardlaw Place.
