The Romancer
Auld Donald McKay,
Wis romantic an’ spry,
an’ yin day said: “Maggie, my dear.
This paircel o’ fruit,
a’ve never a doot,
cam’ ower the seven oceans tae here.
There’s nuts fur a fill,
sent straight fae Brazil.
Here’s pine-aipple chunks in a can.
They bananies? Oh my,
I ken whaur they lie;
‘Mid breezes on yon Palambang.
Noo Maggie, see this;
Looks sweet as a kiss,
an orange fae Israel auld.
Some dates fur a feast,
oot o’ warm Middle East,
red aipples fae Canada cauld”.
As Donald enthused,
puir Maggie - bemused -
began tae feel weary an’ thrawn.
(Some groceries tae,
were under his sway…
“This tea cam’ fae ancient Ceylon.”)
“Weel noo, are ye shair,
there’s no’ ony mair?”
said Maggie, an’ rose tae her feet.
“Sich havers an’ rot,
the hale bloomin’ lot -
cam’ fae Shoppie, at fit o’ the street”.